(за умерших без святаго Крещения; для келейного чтения)

Ирмос: Колесницегонителя фараоня погрузи, чудотворяй иногда Моисейский жезл, крестообразно поразив и разделив море, Израиля же беглеца пешеходца спасе, песнь Богови воспевающа.

Припев (при келейном чтении): Святый мучениче Уаре, моли Бога о нас.

Умолен буди, Господи, святым Твоим Уаром мучеником и облецися в милость и щедроты; и сия даже до ада излиются, Человеколюбче, и ущедрят, яже от нас просимыя богатным Твоим милосердием.

Мучениче Христов великий, озлобленныя и безпомощныя воспомяни, седящия во мраце тьмы непросветимыя, и не престани, припадая ко щедрому Господу, дондеже утешит я богатным Своим милосердием.

О роде Клеопатры дивныя умолити возмогл еси, славный страстотерпче, убо и днесь, возмогая, возможеши свободити от мук, иже от нас воспоминаемыя, аще прилежно о них ко Господу помолишися, тебе бо ради утешит я Владыка богатным Своим милосердием.

Богородичен: Безпомощным Благая Помощнице, призри от славы Своея, Владычице, ко мраку адову и виждь беды умиленных, пред Тобою нами воспоминаемых, и не престани о них умоляя Своего Сына и щедраго Господа и Владыку, дондеже утешит я богатным Своим милосердием.

Ирмос: Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Лик святых Сил Небесных подвигни с собою на молитву, мучениче, и сотвори дело пречудно, и велико, и честно, паче же радость неимущим надежды и утешения не уповающим, горьким нашим неверно умершим прародителем и еже с ними воспоминаемым, еже даровати сим от Господа прощение и велию милость.

Изрядный страстотерпче и Христу любимый, увеждь, коль желательна свобода мучимым и отрада, сице убо и наша сродники, и иже с ними неверия ради, вечныя муки притяжавшия, меры не обрящут своим радостем, аще изпросиши сим от Господа прощение и велию милость.

Уаре, добропобедный страдальче, милостив буди и к нашим молением, и зри удрученных несказанную нужду, и сам, от жалости понужден, неотступно молися к Человеколюбцу Владыце, да подаст им прощение и велию милость.

Богородичен: Всемирная надеждо, Богоприятное селение, наше к Богу примирение, Марие Владычице, приими прошения настоящаго предстояния и не престани моляся к Сыну Своему и всяческих Господу, да подаст безнадежным Тебе ради прощение и велию милость.

Седален

Аще молишися за весь мир, великомучениче, и не престаеши, прося всем милости и всяким преступником всеми образы люто Владыце досадившим и непрестанно досаждающим, иже мертвыми делы себе до конца умертвившим и ничтоже приобретшим, яко зло сотворшим, такоже, страстотерпче, предстани и о наших умерших сродницех, яко возможная начиная, не отступи, моляся и припадая к милующему всех Господу, да простит и помилует, иже во тьме седящия и люте зело огорченныя.

Ин седален

Радости вечныя насельниче, Небесному покою тезоименитый, Уаре великий, дерзая, да дерзнеши воспомянути пред Господем умиленныя четы наших прародителей, аще бо и не в гробе оных полагаем тя, усердным же прошением к жалости, еже от них, совокупляем тя. Темже припади и молися, не отринет бо предстояния твоего Владыка, но от безмерныя благостыни преклонен, пошлет преогорченным избавление и велию милость.

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив, тем с пророком Аввакумом зову Ти: силе Твоей слава, Человеколюбче.

Ельма убо, страстотерпче, всех любиши с верою к тебе прибегающих, темже и любим быти от молящих тя благопоспеши. Что же ино с желанием прославити тя Человеколюбный сотворит, не поданием ли просимыя милости умиленным и всякия отрады лишенным вечным узником, тако и впредь, о доблий мучениче, неоскудей о сих моляся.

Зима люта и спасения безплодие облежит в нечестиих умершия и плач безотраден, зде убо вочтени суть, иже от нас воспоминаемыя. Ты же, страстотерпче, соединити сих к роду праведных потщися и не оскудей о них моляся.

Адова мрачная темница во веки да не обымет прародители и сродники наша и вся, воспоминаемыя с ними: тебе, дивному страдальцу, силу неверия и греховную мощь низложившу, тако и впредь сих еже с Клеопатриным родом простити не оскудей, мучениче, моляся.

Богородичен: Тобою, Пречистая, познахом славити всяческих Содетеля, и от Тебе Плотоносца непрелестна Спаса величати навыкохом, и Тя, Владычицу, хвалим, и Тебе покланяемся, и молим, помилуй умершия в неверии наша сродники и еже избавити сих не оскудей к Сыну моляся.

Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Всяко дарование, мучениче, и всяка милость от милостиваго Господа изливаемы, аще и предивны, и пречудесны суть, слагаеми же к прощению в нечестии умерших, величество преизящно сему оставляют. Темже и днесь великая сотворити потщися, Владыку, мучениче, умолити.

Не отвратися, Господи, от нашего умиления, ниже помяни множество грехов наших, паче же помяни древния Своя милости, и ради щедрот Твоих, и ради Уара страдальца добляго, не оскудей в богатстве безмернаго Твоего милосердия, но излей милости и прощение, еже от нас воспоминаемым.

Есть убо, великомучениче, и достизает человеколюбие Владычне и к сущим в мори далече, темже предстани и днесь и, припадая, умоли Его еже помиловати удаленныя и веры, и Крещения отчужденныя умершия наша сродники и всем, иже с ними воспоминаемым, даровати прощение и велию милость.

Богородичен: Предстани, Владычице, нашему изнеможению и буди выну в нуждах, помогая нам всюду и присно, Ты бо еси Христианская Надежда и Упование, темже не отрини наша прошения, но сотвори совершена и исполнена неисписанною Твоею благодатию.

Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Шатания вражия да не возрадуются, души в корысть получивши, ты же, мучениче, теплыми своими молитвами разруши хотения его, умоляя Господа еже простити нами воспоминаемыя и от вечныя муки тоя и нас избавити.

Начало нашему подвигу Клеопатрина рода прощение, отсюду убо виновное восприяхом возставити тя на молитву, и о еже нами поминаемых не презри, великомучениче, и не отрини грешных предстояние, но, потщався, испроси у Владыки Христа оным прощение и от горьких мук избавление.

Иже неверия ради срете конец зол, и чаяние благих весьма погибе прогневания Божия ради, ты же, страстотерпче, дерзновение прием, радость отпущения вместо страшнаго томления от Небеснаго Царя изпроси и, извед от горести, соблюди во Владычней милости.

Богородичен: Кая, Владычице, злоба превозможет Твоя Матерния молитвы? Воистину убо, аще предстанеши и днесь, моля за просимыя Тобою, сотвориши оным радостное прощение, избавление и велию милость.

Христу последуя, мучениче Уаре, Того испив чашу, и венцем мучения увязеся, и со Ангелы ликовствуеши, моли непрестанно за души наша.

Воспомяни наша глаголы, светлый жителю Небесный, Христов славный великомучениче Уаре, вечному покою тезоименитый, и великими твоими страдании непроходимое и светлое покоище приобретый от непреходныя темницы, и томления непрестаннаго, и нужды, потщися богоприятными твоими молитвами избавити рабы умиленныя, ихже ради молим тя, предстояще и во усердии взывающе, исполни наша прошения, святе, и Христа Бога моли непрестанно за души наша.

Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси, Боже отец наших.

Яко же солнце, Господи, всех просвещаеши, и всем дождь независтно изливаеши, и прогневающим Тя милость непрестанно даруеши, и ныне послушай Уара, Твоего страдальца, и пролей милость Твою до конца оныя отчужденным сродником нашим и яже с ними неверным, Человеколюбче.

Ныне, якоже и прежде, щедр буди, Господи, и умолен явися, Владыко, якоже о Клеопатре содея, сице и о нас, Милостиве, сотвори; посли Своя щедроты и милосердие ко еже нами воспоминаемым, Источник бо еси милости неисчерпаемый.

Аще пророк, восперяяся, поет милости Твоя, Господи, во веки, убо неоскудевша Тя в щедротах веруем, яко милосердия Твоего пределы неизмеримы, и от пучины во глубину потопшим излияти милости Тя умоляем, исполни убо ради мученика сие, о Владыко наш.

Богородичен: Гору Тя сказует премудрый во пророцех, мы же тому и еже от Тебе Каменю Богородия изыти без примешения мужеска, веруем; имже наше спасение и от глубин адовых возведение получихом, Владычице, возведи и днесь от ада воспоминаемыя нами, да Тя, Всемилостивую, непрестанно величаем.

Ирмос: Мусикийским органом согласующим и людем безчисленным покланяющимся образу в Деире, три отроцы не повинувшеся, Господа воспеваху и славословляху во вся веки.

Шары да будут словеса древния Твоя, милости, Господи, сказующия и нашу надежду воздвижущия, яко послушал еси святыя Твоя, Господи, еже помиловати неверныя умершия, ихже и днесь приводим Ти на молитву, да прошения их ради ущедриши инославно умершия, ведением и неведением Тебе, Владыко, досадившия.

Агнче Божий, Пречистою Своею Кровию нас искупивый, Феклино и блаженнаго Григория моление услышав, Мефодия со многими и Макария прием прошения, и отраду, и избаву зловерным подав умершим, и Златоустаго о сих молитися написати воздвигнув, приими убо, Владыко, с сими славнаго Уара и молитвами их воспоминаемыя от нас прости и помилуй.

Радость нам испроси, великомучениче, возвесилимся бо, аще обрящем твоими молитвами избавленныя от вечных мук наша сродники; всегда бо твоя молитвы Владыка слышит и прошения исполняет, ты же убо не оскудей о сих и ныне моляся, да тя выну прославляем.

Богородичен: Пренепорочная Владычице, обилуй множеством милосердия и щедрот, дивная и Безневестная Мати Царева, нам бо милости взыскающим, где инде сию обрящем, аще не к Тебе поспешим, припадающе, Ты бо Поток сладости преизобилен нам родила еси, Преблагословенная.

Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес, тем Тя, Богородицу, Ангелов и человек чиноначалия величают.

О Бозе да возможеши, Уаре славный, Богоприятными твоими молитвами восприяти и излияти милости, иже до конца оныя отчужденным, Един бо есть щедрот и милосердия Родитель, и вся Ему возможна яко Владыце, к Нему же неотступно, страдальче, молися простити и помиловати яже от нас воспоминаемыя.

Дело соверши предивно, о великомучениче, и славе твоей прикладно, еже от Господа прощение и праведнаго Его гнева пременение испросити огорченным темнаго зловерия ради нашим прародителем и еже сих, в горести и во ожидании лютейших сущих, да возмеши в безстрашное избавление, идеже веси Владыка прощенныя положити.

И кое убо чудо явится сего дивнейши, кая слава знаменитейши, и кое милосердие таковаго больши, аще ты, мучениче, сожалев, умолиши милостиваго Господа отпустити грех нечестия, иже от нас поминаемых, и лютаго томления оных избавити.

Богородичен: Владычице милостивая, человеколюбивая и зло не помнящая, приими жалость нашего прошения и ходатайствуй неотступно о милости к милостивому Твоему Сыну и Владыце, еже помиловати и простити грех инославия умершим сродником нашим и яже с ними помянутым, отпущение и место сим милости неотъемлемо подати.

Светилен

Праведно убо да будет, Владыко Господи, простившему Ти Клеопатрины прародители, и днесь услышати молитву Уара Твоего великомученика и наше, многогрешных, предстояние: от мук избавити, иже с жалостию пред Тобою воспоминаемыя. Темже ускори, Щедрый, и потщися яко милостив помиловати сих, яко можеши, хотяй.

Молитва

О, святый мучениче Уаре досточудный, ревностию по Владыце Христу разжигаем, Небеснаго Царя пред мучителем исповедал еси, и о Нем усердно пострадал еси, и ныне Церковь почитает тя, яко прославляемаго от Владыки Христа славою Небесною, Иже дарова тебе благодать великаго к Нему дерзновения, и ныне предстоиши Ему со Ангелы, и в Вышних ликуеши, и зриши ясно Святую Троицу, и светом Безначальнаго Сияния наслаждаешися, воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными, потщися испросити оным от вечныя тьмы избавление, да вси едиными усты и единем сердцем восхвалим Премилосерднаго Творца во веки веков. Аминь.

Емуже дана быть благодать умолити за умерших Клеопатрины прародители, несподобльшияся прияти святаго крещения

Древняя Русь при всей строгости своего отношения к умершим, находила возможным молиться не только об обращении живых к истинной вере, но и об избавлении от мук в иноверии умерших. При этом она прибегала к предстательству святого мученика Уара. В старинных сборниках имеется специальный канон на cей случай, совершенно отличный от канона, помещающегося в октябрьской Минее под 19 числом. Этот канон предназначается главным образом для тех, чьи ближайшие родственники или предки скончались вне общения с Православною Церковью. Кроме того, по-видимому, имеется в виду и то, что каждый из православных имеет отдаленных предков, умерших вне Православной Церкви, о которых, как о своих прародителях, подобает печаловаться. В соответствии с этим в каноне испрашивается предстательство святого мученика пред Господом и прощении и пременении праведного Его гнева огорченным темнаго зловерия ради нашим прародителям, в нечестии, инославии и даже в язычестве умерших.

Причина, по которой именно к мученику Уару обращаются с подобной молитвой, та, что он, согласно преданию, молился ко Господу о прощении и спасении родственников-язычников блаженной Клеопатры, погребшей его мощи в своей родовой усыпальнице. Сего ради и мы взываем ко святому Уару: аще молишися за весь мир, великомучениче, и не преставши прося всем милости и всяким сущим всеобразным преступником и люто Владыке досадившим и досаждающим иже мертвыми делы себе до конца уморившим и ничтоже от мертвых (т. е. ставших ничем не лучше мертвых), яко во зло успевающим такоже, их страстотерпче, предстани и наших умерших сродницех, припадая ко Господу, да простит и помилует, иже во тьме седящия. Если пророк поет милости Господни возвести, то и мы веруем, что неоскудны щедроты Его и доныне, и поэтому просим Его: Агнче Божий, пречистою Твоею Кровию нас искупивый, Феклино и блаженного Григория моление услышавый, Мефодия со многими и Макария приемый прошение, и отраду и избаву зловерным подавый умершим, и Златоустаго и сих молитися написати воздвигнувый, приими убо Владыко с ними и славнаго Уара и молитвами их, от нас воспоминаемых, прости и помилуй.
Выдержка из книги Свт. Афанасия (Сахарова) «О поминовении усопших по уставу Православной Церкви»

КАНОН Глас 8,

имый краестрочие: умоли, Уаре, за внешния наши роды

Песнь 1

Ирмос: Колесницегонителя фараоня погрузи, чудотворяй иногда, Моисейский жезл крестообразно поразив и разделив море, Израиля же беглеца пешеходца спасе, песнь Богови воспевающа.
Святый мучениче Уаре, моли Бога о нас.

Умолен буди, Господи, святым Твоим Уаром мучеником и облецися в милость и щедроты; и сия даже до ада излиются, Человеколюбче, и ущедрят, яже от нас просимыя, богатным Твоим милосердием.
Святый мучениче Уаре, моли Бога о нас.

Мучениче Христов великий, озлобленныя и безпомощныя воспомяни, седящия во мраце тьмы не просветимыя, и не престани, припадая ко щедрому Господу, дондеже утешит я богатным Своим милосердием.
Святый мучениче Уаре, моли Бога о нас.

О роде Клеопатры дивныя умолити возмогл еси, славный страстотерпче, убо и днесь, возмогая, возможеши свободити от мук, иже от нас воспоминаемыя, аще прилежно о них ко Господу помолишися, тебе бо ради утешит я Владыка богатным Своим милосердием.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Безпомощным Благая Помощнице, призри от славы Своея, Владычице, ко мраку адову и виждь беды умиленных, пред Тобою нами воспоминаемых, и не престани о них умоляя Своего Сына и щедраго Господа и Владыку, дондеже утешит я богатным Своим милосердием.

Песнь 3

Ирмос: Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.
Святый мучениче Уаре, моли Бога о нас.
Лик святых Сил Небесных подвигни с собою на молитву, мучениче, и сотвори дело пречудно, и велико, и честно, паче же радость неимущим надежды и утешения не уповающим, горьким нашим неверно умершим прародителем и еже с ними воспоминаемым, еже даровати сим от Господа прощение и велию милость.
Святый мучениче Уаре, моли Бога о нас.

Изрядный страстотерпче и Христу любимый, увеждь, коль желательна свобода мучимым и отрада, сице убо и наша сродники, и иже с ними неверия ради вечныя муки притяжавшия, меры не обрящут своим радостем, аще испросиши сим от Господа прощение и велию милость.
Святый мучениче Уаре, моли Бога о нас.

Уаре, добропобедный страдальче, милостив буди и к нашим молением, и зри удрученных несказанную нужду, и сам, от жалости понужден, неотступно молися к Человеколюбцу Владыце, да подаст им прощение и велию милость.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Всемирная надеждо, богоприятное селение, наше к Богу примирение, Марие Владычице, приими прошения настоящаго предстояния и не престани моляся к Сыну Своему и всяческих Господу, да подаст безнадежным Тебе ради прощение и велию милость.

Седален, глас 5:

Аще молишися за весь мир, великомучениче, и не престаеши, прося всем милости и всяким преступником всеми образы люто Владыце досадившим и непрестанно досаждающим, иже мертвыми делы себе до конца умертвившим и ничтоже приобретшим, яко зло сотворшим, такоже, страстотерпче, предстани и о наших умерших сродницех, яко возможная начиная, не отступи, моляся и припадая к милующему всех Господу, да простит и помилует, иже во тьме седящия и люте зело огорченныя.

Другий седален, глас 3:

Радости вечныя насельниче, Небесному покою тезоименитый, Уаре великий, дерзая, да дерзнеши воспомянути пред Господем умиленныя четы наших прародителей, аще бо и не в гробе оных полагаем тя, усердным же прошением к жалости, еже от них, совокупляем тя. Темже припади и молися, не отринет бо предстояния твоего Владыка, но от безмерныя благостыни приклонен, пошлет преогорченным избавление и велию милость.
Слава, и ныне, Богородичен:
Пресветлая Госпоже, от Небесных сил превоспеваемая, и выну возвеличаемая, Мати Царя всяческих, где убо и когда хощет умножитися Твоя слава и величество, не тогда ли, егда грешныя заступаеши и весь мир молитвами Своими покрываеши, темже и днесь умножи, Владычице, велелепоту Твоего превозхождения, избави теплыми Твоими молитвами от лютых мук неверныя наша и некрещенныя сродники и с яже о них и с ними воспоминаемыя, и подаждь оным избавление и велию милость.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив, тем с пророком Аввакумом зову ти: силе Твоей слава, Человеколюбче.
Святый мучениче Уаре, моли Бога о нас.

Ельма убо, страстотерпче, всех любиши с верою к тебе прибегающих, темже и любимь быти от молящих тя благопоспеши. Что же ино с желанием прославити тя Человеколюбный сотворит, не поданием ли просимыя милости умиленным и всякия отрады лишенным вечным узником, тако и впредь, о доблий мучениче, не оскудей о сих моляся.
Святый мучениче Уаре, моли Бога о нас.

Зима люта и спасения безплодие облежит в нечестиих умершия и плач безотраден, зде убо причтены суть, иже от нас воспоминаемыя. Ты же, страстотерпче, соединити сих к роду праведных потщися и не оскудей о них моляся.
Святый мучениче Уаре, моли Бога о нас.

Адова мрачная темница во веки да не обымет прародители и сродники наша и вся, воспоминаемыя с ними: тебе, дивному страдальцу, силу неверия и греховную мощь низложившу, тако и впредь сих еже с Клеопатриным родом простити не оскудей, мучениче, моляся.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Тобою, Пречистая, познахом славити всяческих Содетеля, и от Тебе Плотоносца непрелестна Спаса величати навыкохом, и Тя, Владычицу, хвалим, и Тебе поклоняемся, и молим, помилуй умершия в неверии наша сродники, и еже избавити сих не оскудей к Сыну моляся.

Песнь 5

Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.
Святый мучениче Уаре, моли Бога о нас.

Всяко дарование, мучениче, и всяка милость от милостиваго Господа изливаемы, аще и предивны, и пречудесны суть, слагаеми же к прощению в нечестии умерших, величество преизящно сему оставляют. Темже и днесь великая сотворити потщися, Владыку, мучениче, умолити.
Святый мучениче Уаре, моли Бога о нас.

Не отвратися, Господи, от нашего умиления, ниже помяни множество грехов наших, паче же помяни древния Своя милости, и ради щедрот Твоих, и ради Уара страдальца добляго, не оскудей в богатстве безмернаго Твоего милосердия, но излей милости и прощение, еже от нас воспоминаемым.
Святый мучениче Уаре, моли Бога о нас.

Есть убо, великомучениче, и достизает человеколюбие Владычне и к сущим в мори далече, темже предстани и днесь и, припадая, умоли Его еже помиловати удаленныя и веры, и Крещения отчужденныя умершия наша сродники и всем, иже с ними воспоминаемым, даровати прощение и велию милость.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Предстани, Владычице, нашему изнеможению и буди выну в нуждах, помогая нам всюду и присно, Ты бо еси христианская Надежда и Упование, темже не отрини наша прошения, но сотвори совершена и исполнена неисписанною Твоею благодатию.

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.
Святый мучениче Уаре, моли Бога о нас.

Шатания вражия да не возрадуются, души в корысть получивши, ты же, мучениче, теплыми своими молитвами разруши хотения его, умоляя Господа еже простити нами воспоминаемыя, и от вечныя муки тоя и нас избавити.
Святый мучениче Уаре, моли Бога о нас.

Начало нашему подвигу Клеопатрина рода прощение, отсюду убо виновное восприяхом возставити тя на молитву, и о еже нами поминаемых не презри, великомучениче, и не отрини грешных предстояние, но, потщався, испроси у Владыки Христа оным прощение и от горьких мук избавление.
Святый мучениче Уаре, моли Бога о нас.

Иже неверия ради срете конец зол, и чаяние благих весьма погибе прогневания Божия ради, ты же, страстотерпче, дерзновение прием, радость отпущения вместо страшнаго томления от Небеснаго Царя испроси и, извед от горести, соблюди во Владычней милости.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Кая, Владычице, злоба превозможет Твоя матерния молитвы? Воистину убо, аще предстанеши и днесь, моля за просимыя Тобою, сотвориши оным радостное прощение, избавление и велию милость.

Кондак, глас 4:

Христу последуя, мучениче Уаре, Того испив чашу, и венцем мучения увязеся, и со Ангелы ликовствуеши, моли непрестанно за души наша.
Икос:
Воспомяни наша глаголы, светлый жителю Небесный, Христов славный великомучениче Уаре, вечному покою тезоименитый, и великими твоими страдании непроходимое и светлое покоище приобретый от непреходныя темницы, и томления непрестаннаго, и нужды, потщися богоприятными твоими молитвами избавити рабы умиленныя, ихже ради молим тя, предстояще и во усердии взывающе, исполни наша прошения, святе, и Христа Бога моли непрестанно за души наша.

Песнь 7

Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице, ликующе, пояху: благословен еси, Боже отец наших.
Святый мучениче Уаре, моли Бога о нас.

Яко же солнце, Господи, всех просвещаеши, и всем дождь независтно изливаеши, и прогневающим Тя милость непрестанно даруеши, и ныне послушай Уара, Твоего страдальца, и пролей милость Твою до конца оныя отчужденным сродником нашим и яже с ними неверным, Человеколюбче.
Святый мучениче Уаре, моли Бога о нас.

Ныне, якоже и прежде, щедр буди, Господи, и умолен явися, Владыко, якоже о Клеопатре содея, сице и о нас, Милостиве, сотвори; посли Своя щедроты и милосердие ко еже нами воспоминаемым, источник бо еси милости неисчерпаемый.
Святый мучениче Уаре, моли Бога о нас.

Аще пророк, восперяяся, поет милости Твоя, Господи, во веки, убо не оскудевша Тя в щедротах веруем, яко милосердия Твоего пределы неизмеримы, и от пучины во глубину потопшим излияти милости Тя умоляем, исполни убо ради мученика сие, о Владыко наш.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Гору Тя сказует премудрый во пророцех, мы же тому и еже от Тебе Каменю Богородия изыти без примешения мужеска, веруем; Имже наше спасение и от глубин адовых возведение получихом, Владычице, возведи и днесь от ада воспоминаемыя нами, да Тя, Всемилостивую, непрестанно величаем.

Песнь 8

Ирмос: Мусикийским органом согласующим и людем безчисленным поклоняющимся образу в Деире, три отроцы не повинувшеся, Господа воспеваху и славословяху во вся веки.
Святый мучениче Уаре, моли Бога о нас.

Шары да будут словеса древния Твоя, милости, Господи, сказующия и нашу надежду воздвижущия, яко послушал еси святыя Твоя, Господи, еже помиловати неверныя умершия, ихже и днесь приводим Ти на молитву, да прошения их ради ущедриши инославно умершия, ведением и неведением Тебе, Владыко, досадившия.
Святый мучениче Уаре, моли Бога о нас.

Агнче Божий, Пречистою Своею Кровию нас искупивый, Феклино и блаженнаго Григория моление услышав, Мефодия со многими и Макария прием прошения, и отраду, и избаву зловерным подав умершим, и Златоустаго о сих молитися написати воздвигнув, приими убо, Владыко, с сими славнаго Уара и молитвами их воспоминаемыя от нас прости и помилуй.
Святый мучениче Уаре, моли Бога о нас.

Радость нам испроси, великомучениче, возвеселимся бо, аще обрящем твоими молитвами избавленныя от вечных мук наша сродники; всегда бо Твоя молитвы Владыка слышит и прошения исполняет, ты же убо не оскудей о сих и ныне моляся, да тя выну прославляем.

Слава Отцу, и Сыну, и Святому Духу и ныне и присно и во веки веков. Аминь.
Богородичен: Пренепорочная Владычице, обилуй множеством милосердия и щедрот, дивная и Безневестная Мати Царева, нам бо милости взыскающим, где инде сию обрящем, аще не к Тебе поспешим, припадающе, Ты бо Поток сладости преизобилен нам родила еси, Преблагословенная.

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес, тем Тя, Богородицу, Ангелов и человек чиноначалия величают.
Святый мучениче Уаре, моли Бога о нас.

О Бозе да возможеши, Уаре славный, богоприятными твоими молитвами восприяти и излияти милости, иже до конца оныя отчужденным, Един бо есть щедрот и милосердия Родитель, и вся Ему возможна яко Владыце, к Немуже неотступно, страдальче, молися, простити и помиловати яже от нас воспоминаемыя.
Святый мучениче Уаре, моли Бога о нас.

Дело соверши предивно, о великомучениче, и славе твоей прикладно, еже от Господа прощение и праведнаго Его гнева пременение испросити огорченным темнаго зловерия ради нашим прародителем и еже сих, в горести и во ожидании лютейших сущих, да возмеши в безстрашное избавление, идеже веси Владыка прощенныя положити.
Святый мучениче Уаре, моли Бога о нас.

И кое убо чудо явится сего дивнейши, кая слава знаменитейши, и кое милосердие таковаго больши, аще ты, мучениче, сожалев, умолиши милостиваго Господа отпустити грех нечестия, иже от нас поминаемых, и лютаго томления оных избавити.
Слава Отцу, и Сыну, и Святому Духу и ныне и присно и во веки веков. Аминь.

Богородичен: Владычице милостивая, человеколюбивая и зло не помнящая, приими жалость нашего прошения и ходатайствуй неотступно о милости к милостивому Твоему Сыну и Владыце, еже помиловати и простити грех инославия умершим сродником нашим и яже с ними помянутым, отпущение и место сим милости неотъемлемо подати.

Светилен:

Праведно убо да будет, Владыко Господи, простившему Ти Клеопатрины прародители, и днесь услышати молитву Уара Твоего великомученика и наше, многогрешных, предстояние: от мук избавити, иже с жалостию пред Тобою воспоминаемыя. Темже ускори, Щедрый, и потщися яко милостив помиловати сих, яко можеши, хотяй.

Слава, и ныне, Богородичен:

Потщися, Владычице, услышати нашу молитву, яже в Твоей Церкви к Тебе приносимую, и Сама, Богородительнице, преклони на милость Сына Своего и Владыку еже помиловати и от праведнаго гнева разрешити умершия прародители, други же и сродники наша, ускори убо, Всемилостивая, избавити сих, можеши бо яко милостива, хотящая всем милости.

Молитва Святому Мученику Уару

О святый мучениче Уаре досточудный! Ревностию по Владыце Христу разжигаемь, Небеснаго Царя пред мучителем исповедал еси, и о Нем усердно пострадал еси, и ныне предстоиши Ему со ангелы, и в вышних ликуеши, и зриши ясно Святую Троицу, и светом Безначальнаго Сияния наслаждаешися, воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными, потщися испросити оным от вечныя тьмы избавление, да вси едиными усты и единем сердцем восхвалим Премилосерднаго Творца во веки веков. Аминь.

Память: 19 октября / 1 ноября

Мученик Уар (слева) и святой Артемий. Икона, XVII век. Москва

Песнь 1

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Припев: Святый мучениче Уаре, моли Бога о нас.

Явился еси на высоте Христовы Церкве, Уаре, якоже солнце светлое, блистаньми просвещая твоих борений, блаженне, земная исполнения.

Божественныя любве, всеблаженне, объят сладким рачением, отверглся еси себе и ко всякой муце плотстей устремился еси, крепко подвизався.

Слава Отцу, и Сыну, и Святому Духу.

Смысленно Божественных подвижник юзами связав себе, страстотерпче, и лестныя разорил еси узы крепким терпением многих мук.

И ныне и присно, и во веки веков. Аминь.

Богородичен: Пресущественное Слово во Твоем чреве паче слова вселися и, родився Боголепно, мученическия лики, Чистая, приведе, с нимиже песнословим Тя.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Припев: Святый мучениче Уаре, моли Бога о нас

Вшел еси разумом крепким в мужественныя подвиги, утвердився надеждами будущих благих и мучеников Христовых всемудрыми, блаженне, поучении.

Воинство святых страстотерпец, страждущих законне зря, онех показал еси мужескую крепость, примешаяся многообразным, Уаре, мукам.

Слава Отцу, и Сыну, и Святому Духу.

В полце священнем, Уаре, яко доблий воин, обрелся еси и ссек множество мужества мечем, мудре, ратным, победами славим.

И ныне и присно, и во веки веков. Аминь.

Богородичен: Дево Мати Божия, моего уныния глубочайшую тьму и облаки страстей просвещением, еже в Тебе, молю Тя, благодати, отжени.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи, помилуй, трижды.

Седален, глас 4

Страсти честных видев мучеников и тех лобзав узы любовию, на высоту востекл еси свидетельства, всечудне, на древе бо повешен, раны претерпел еси, дондеже в руки Господни духа предал еси.

Песнь 4

Ирмос: Христос моя сила, Бог и Господь, Честная Церковь Боголепно поет, взывающи, от смысла чиста, о Господе празднующи.

Припев: Святый мучениче Уаре, моли Бога о нас

Святыми язвами удобряемь, краснейший явился еси, и Богу, Уаре, возлюблен, Венчавшему твой верх, досточудне.

На кресте, славне, растязаемь и на земли простираемь, лютыя болезни претерпел еси. Тем неболезненную жизнь наследовал еси, веселяся.

Законно видяще Божественнии мученицы страждуща тя, блаженне, терпения словесы укрепляху, с нимиже страсти долгия совершив, ублажился еси.

Слава Отцу, и Сыну, и Святому Духу.

Хвалами венчаем Божественныя мученики, яже венча благодать Божественная Божественными увязении, низложших вражия высокая мудрования.

И ныне и присно, и во веки веков. Аминь.

Богородичен: От тины страстей, Владычице, возведи, и страстных помышлений, отчуждающих мя Бога Единаго Чистаго, да верою ублажаю Тя.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.

Припев: Святый мучениче Уаре, моли Бога о нас

Укрепляешися мановеньми Божественными и неослабная терзания терпиши доблим смыслом, Уаре, растерзал гордаго сердце, злобу соделавшaro.

Славный мученик, видя отпадающия на землю своя плоти, радовашеся, вечнующая ума светлостию и Божественная воздания предпрозирая.

Слава Отцу, и Сыну, и Святому Духу.

Пою Тя, Господи Боже, и славословлю, и покланяюся, благих сподобляяся, уготованных Тебе возлюбльшим, мученик в страдании тепле зовяше.

И ныне и присно, и во веки веков. Аминь.

Богородичен: Явльшися Херувим и Серафим яко воистину святейши, Всенепорочная, вся, верно Тя ныне освящающия, освяти и спаси ходатайством Твоим.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Припев: Святый мучениче Уаре, моли Бога о нас

Глаголов небрегл еси пребеззаконнаго врага и пламень претерпел еси нестерпимых болезней терпеливно, многострадальне Уаре, молебниче о хвалящих тя верою.

Не престаше мучитель пребезумный, ранами немилостивно сдробляя тя, дондеже в руки Божия священную твою душу предал еси, добротами просвещшуся подвиг твоих.

Слава Отцу, и Сыну, и Святому Духу.

Возвысился еси, подобяся на древе Христу, и на том вися, твою душу предал еси Богу, тя венчавающу, страстотерпче, законно доблествовавша.

И ныне и присно, и во веки веков. Аминь.

Богородичен: Управи, Владычице, в пучине лютых, обуреваемую всегда смиренную душу мою, и к тихому пристанищу направи, несомненным разумом Тя блажащую.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи, помилуй, трижды. Слава, и ныне:

Кондак, глас 4

Христу последуя, мучениче Уаре, Того испив чашу, и мучения венцем увязеся, и со Ангелы ликовствуеши: моли непрестанно за души наша.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Припев: Святый мучениче Уаре, моли Бога о нас

Просвещена тя подвигов приложеньми, предобрая Клеопатра, Уаре, скутала есть, обретши славу тобою, веры достойну яве, юже показа тепле в твое скончание.

Изливающи на тя слезы и миры тя честными помазующи, сокрывает тя под землею всечестная жена, погребшаго прелесть лукавую и из гроба блистаньми просвещающа нас.

Слава Отцу, и Сыну, и Святому Духу.

Не престаяше, преподобне, угождающи тебе Христову угоднику, приснопамятная, дондеже явился еси ходатай ей, мудре, Царствия Небеснаго, егоже сподобися тобою с любезнейшим сыном.

И ныне и присно, и во веки веков. Аминь.

Богородичен: Сокрушена мя безчисленными согрешении, Дево, ходатайством Твоим обнови, уврачующи мою душу и слово подающи, вопити: благословена, Яже Бога плотию рождшая.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Песнь 8

Ирмос: Из пламене преподобным росу источил еси и праведнаго жертву водою попалил еси, вся бо твориши, Христе, токмо еже хотети: Тя превозносим во вся веки.

Припев: Святый мучениче Уаре, моли Бога о нас

Матерних послушав, мучениче, молеб, Небесному воинству светло воинствуя, отрока честнаго и твоего неотступна показал еси благославия неизреченным милосердием.

От Египта тя богатство якоже многоценное принесе, мучениче, разбогатящи многоценными дарми, Клеопатра, целении всю Палестину, любовию тя почитающую.

Слава Отцу, и Сыну, и Святому Духу.

Веселяся, подвиги твоя совершил еси, воине доблий Вседержителя, и яко победитель от Него венчался еси, Уаре всеблаженне, мучеников великая славо.

И ныне и присно, и во веки веков. Аминь.

Богородичен: Грехи прилагаю ко грехом и будущаго не боюся Страшнаго Суда: победи, Чистая, души моея ослепление и, мольбою Твоею обративши, мя спаси.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Песнь 9

Ирмос: Бога человеком не возможно видети, на Негоже не смеют чини Ангельстии взирати: Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

Припев: Святый мучениче Уаре, моли Бога о нас

Крепость низложил еси ратоборца, Божественною яве силою препоясався, страдальче доблий Уаре. Тем тя хвалим, врачевание обильное от твоих мощей, вернии, почерпающе.

Яко свет, яко утро, яко великое солнце в земныя простреся память твоя концы, светоносными просвещающи сияньми твоих честных подвиг вся, прехвальне, и мрак сердец отгоняющи.

С тобою сияюща видевши славою многою своего сына чадолюбивая, всех Бога величаше; тебе же искреннейше, мучениче, славяше, величайшаго предстателя, явственно обогатившися.

Слава Отцу, и Сыну, и Святому Духу.

Земля, на нейже терпеливейшее тело твое, мудре, лежит, Божественне освятися, но даждь молитвами твоими нам разрешение грехов, жития исправление, Уаре, и всех неудобных избавление.

И ныне и присно, и во веки веков. Аминь.

Богородичен: Явлься, Дево, из Тебе Господь, светлаго облака, египетския кумиры всяческой пагубе предаде; множество же страстотерпцев Сего носити сподоби, Сего подражатели честным Его страданием.

Катавасия: Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Молитва мученику Уару:

  • Молитва мученику Уару. Уар был военачальником и тайным христианином. Он оказывал помощь многим гонимым и заключенным христианам. Вовремя казни семи христианских учителей открыл свою веру и был замучен. Уар — один из небесных покровителей воинов. Ему молятся в гонениях, тюремном заточении и искушениях, прося твердую веру и мужество.

Канон мученику Уару:

  • Канон мученику Уару

Житийная и научно-историческая литература о мученике Уаре:

  • Мученик Уар — Православие.Ru
  • О святом мученике Уаре и церковной молитве за неправославных — протоиерей Константин Буфеев

[ad01]

Рубрики: Разное

Добавить комментарий

Ваш адрес email не будет опубликован. Обязательные поля помечены *